लस एन्जल्स (एजेन्सी), असार ९ - केही सातायता हलिउड नायिका एन्जेलिना जोली सर्वाधिक चर्चामा छिन् । सधैं सौन्दर्यता र अभिनयका कारण मिडियाको समाचार बन्ने गरेकी उनले केहीअघि आफैंले लेखेको समाचारले विश्व नै हल्लाइन् ।
क्यान्सर खतराका कारण दुवै स्तन काटेर फालेकी उनले उक्त खबर केही सातापछि मात्रै आफ्नै लेखमार्फत खुलासा गरिन् । निकट भविष्यमै विवाह गर्ने समाचार आइरहेका बेला जोलीको पछिल्लो अवस्थामा प्रेमी ब्राड पिटको कदमलाई लिएर चासो राखिएको थियो । उक्त घटनाले रोलमोडल मानिने ब्रान्जेलिना जोडीलाई नै टुटाउने अनुमानलाई ब्राडले गलत सावित गरिदिए । जोलीको कदमलाई साहसिक भनी टिप्पणी गरेका उनले यतिबेला आफ्नो परिवारका कारण आफू सर्वाधिक सम्पन्न र धनी व्यक्ति भएको जिकिर गरेका छन् ।
'तपाईं आफैं थाहा पाउन सक्नुहुन्छ, आफ्ना सन्तान खेल्दै हुर्किरहेको हेर्न पाउँदा परिवार हुनुको महत्त्व कति छ भनेर । बाबु हुनुकै नाताले ममा धेरै परिवर्तन आएको छ, थप उदार र जीवन्त भएको छु,' ब्राडले थपे, 'बच्चाहरू मेरो जीवनको अभिन्न अंग बनेका छन् । बाबु भएको नाताले उनीहरूलाई शिक्षित पार्नु र भविष्यको बाटो देखाउने मेरो कर्तव्य हो । जब म बाबु बने तबदेखि नै आफूलाई संसारमा सबैभन्दा धनी मान्छे मै हुँ ।' उनी र जोलीकै कोखबाट तीन सन्तान जन्मेका छन् भने बाँकी तीन एडप्ट गरेका छन् ।
0 comments
Post a Comment