धूवाँ मात्रै कि ?

मुम्बई (एजेन्सी), असार ११ - समय बलवान् हुन्छ त्यसै भनिएको होइन । केही समयअघि मात्रै सिँगौरी खेलेका अनुष्का शर्मा र सुशान्त सिंह राजपूत यति चाँडै एउटै रेखामा हिँड्लान् भन्ने कसलाई थाहा ? त्यो पनि अँगालो मारेर ?
अनुष्का र सुशान्त दुवै आमिर खान लिड रोलमा रहेको 'पीके' मा खेलिरहेका छन् । अनुष्काले रोल सानो रहेको भन्दै 'काई पो चे' स्टारको खिल्ली उडाउन खोजेकी थिइन् । सुशान्तले पनि प्रत्युत्तरमा वचनवाण प्रहार गरेका थिए । तर यी दुईबीचको समीकरणले अब यू टर्न लिएको छ ।
२५ वर्षे अनुष्का र २७ वर्षे सुशान्त राजकुमार हिरानी निर्देशित उक्त फिल्मको सुटिङका लागि हाल बेल्जियममा छन् । फिल्म युनिटबाट चुहिएको खबर अनुसार, युरोपेली मुलुकमा दुवैले पुराना कुरालाई भुल्ने गरेका छन् । उनीहरू यति घनिष्ठ देखिने गरेका छन्, मानौं अनुष्काले विगतको अन्तरवार्तामा उक्त फिल्ममा सुशान्त 'मेरो जीवनको छोटो अध्यायमा देखिनेछन् र त्यो आठ दिनको मात्रै हुनेछ' भनेकै थिइनन्, मानौं त्यसको जवाफमा सुशान्तले राँकिँदै 'कुनै पनि रोल सानो हुँदैन, एक्टरहरू मात्रै साना हुन सक्छन्' भनेकै थिएनन् ।
यति चाँडो यी दुवै नजिकिनुको कारण के हुन सक्छ ? बेल्जियमको सुन्दर प्रकृतिको कमाल ? आआफ्ना परिवारबाट टाढा रहेका यिनलाई आवश्यकताको सिद्धान्तले निकट बनाएको पनि हुन सक्छ । आयो नबली धूवाँ उडेको त होइन होला ।