छोरी हुर्केपछि एमाले नेता पोखरेलले गरे विवाह दर्ता

२१ असार, दाङ । नेकपा एमालेका सचिव शंकर पोख्रेलले शुक्रबार दाङमा विवाह दर्ता गराउनुभएको छ । आजभन्दा १६ वर्षपहिल्यै विवाह गरिसक्नुभएका पोखरेलले नयाँ विवाह गर्नुभएको चाहिँ होइन । विवाह गरेको झण्डै १६ वर्षपछि शुक्रवार गृह जिल्ला दाङको बिजौरी गाविसमा १ सय ५० रुपैयाँ जरिवाना तिरेर उहाँले १६ वर्ष पहिलेको सुजिता शाक्यसँगको विवाहलाई कानुनी रुप दिनुभएको हो ।


दाङको बिजौरी स्थायी घर भएका शंकर पोख्रेल र संखुवासभाकी सुजिता शाक्यवीच विवाह भएको १६ बर्ष पुगिसकेको छ । पोख्रेलकी एक छोरी अहिले ११ कक्षामा अध्ययनरत हुनुहुन्छ भने अर्की छोरी स्कुलमा पढिरहनुभएको छ ।पूर्वसञ्चारमन्त्री समेत भएका पोख्रेलले व्यक्तिगत घटना दर्ता गराउन राज्यले तोकेको ३५ दिन भन्दा १५ बर्ष ११ महिना पछि बिबाह दार्ता गराएकाले १ सय ५० रुपैयाँ जरिवाना तिरेपछिमात्रै विवाह दर्ता भएको हो ।
बिहे दर्ता गराउनका लागि पोख्रेल र सुजितासहित पार्टीका कार्यकर्ताहरु बिजौरी गाबिसको कार्यालय पुगेका थिए । विवाद दर्तासंगै पोख्रेलले आफ्ना दुई छोरी अंकिता र आकृतिको पनि जन्मदर्ता गराउनुभएको छ ।विवाह दर्तापछि पोख्रेलले भन्नुभयो, ‘कानुनीरुपमा सबै नागरिकहरुलाई व्यक्तिगत घटनाहरु दर्ता गराउनु पर्छ भन्ने मलाई अहिले लाग्यो र यो सन्देश अरुलाई पनि दिनुपर्छ भनेर विवाह दर्ता गराएको हुँ । योसंगै दुई छोरीको पनि जन्मदर्ता गराएको छु ।’
राजनीतिक व्यस्तता र अन्य कारणले गर्दा ढीलो बिहे दर्ता र छोरीहरुको जन्मदर्ता गराउनु परेको पोख्रेलको भनाइ छ । पोख्रेल दम्पतीलाई दर्ता नम्बर ४९ को बिहे दर्ता प्रमाणपत्र प्रदान गर्दै गाबिस सचिब ठाकुरप्रसाद न्यौपानेले गाविसमा आएर दर्ता गराएकोमा धन्यवाद दिनुभयो । ०५४ साल अषाढ २५ गते सुजिता साक्यसँग काठमाण्डौमा पोख्रेलले मागी बिबाह गर्नुभएको थियो । शाक्य एमाले निकट अखिल नेपाल महिला संघकी केन्द्रीय सचिव हुनुहुन्छ ।