रौतहट, जेठ ६ - स्थानीयबासिन्दाले गत शनिवार समातेर जिल्ला बन कार्यालयलाई बुझाएको हरिण बनकै कर्मचारीले मारेर खाएका छन् ।
बसबिट्टी जिंगरियामा रहेको नेपाल प्रहरीका पूर्वआइजिपी प्रदीप शमशेर जबराको निवासनजिकै देखापरेको ठूलो हरिणलाई स्थानीयबासिन्दाले समातेर जिल्ला बन कार्यालयलाई बुझाएका थिए ।
तर त्यही दिन बेलुकी बन कार्यालयका कर्मचारीले हरिणलाई मारेर त्यसको मासु आफू नजिकका स्थानीयबासिन्दालाई समेत पठाएको स्थानीय रामलाल यादवले बताउनुभयो ।
स्थानीयबासिन्दाले पूर्वआइजिपी जबराको निवासमा लगेर जबराकै सल्लाहअनुसार हरिण जिल्ला बन कार्यालय रौतहटका जमदार शेख वबैदुल्लाहलाई हस्तारण गरेका थिए ।
आफूहरुले दुःख गरेर समातेको वन्यजन्तु बनलाई बुझाउँदा आरक्षमा बुझाउनुको साटो त्यसलाई मारेर खाने बनका कर्मचारीको विषयमा छानबिन गरी कारवाही हुनुपर्ने माग स्थानीयबासिन्दाले गरेका छन् ।
हरिण आफैं मरेको बन कर्मचारीको भनाई
जिल्ला वन कार्यालयले भने हरिण ल्याउँदा ल्याउँदै बाटोमा नै मरेको जनाएको छ । जिल्ला वन कार्यालय रौतहटका प्रमुख नन्दलाल यादवले मरेको हरिणको दाहसंस्कार गरिएको र खुर, छाला तथा सिङलाई प्रमाणको रुपमा राखिएको जानकारी दिएको प्रमुख जिल्ला अधिकारी दिल बहादुर घिमिरेले बताउनुभयो ।
यादवले जंगली हरिण गाउँलेको लखेटाइबाट दौड्दा दौडँदै थाकेको हरण बन कार्यालयमा ल्याय लगत्तै बेहोस भएर मरेको दावी गर्नुभयो । उहाँले मरेको हरिणलाई बन ऐन अनुसार दाह संस्कार गरेको भन्दै स्थानीयबासिन्दाको आरोप अस्वीकार गर्नुभएको छ ।
0 comments
Post a Comment