एमाओवादीमा विवादबीच नेताहरूको बढुवा

काठमाडौं, असार १४ - एमाओवादीले लामो विवाद र छलफलपछि केन्द्रीय पदाधिकारी र स्थायी समिति विस्तार टुंगो लगाएको छ । केन्द्रीय पदाधिकारी (हेडक्वाटर) बैठकले बिहीबार विवाद सल्टाएको हो ।
महासचिव पोस्टबहादुर बोगटीलाई उपाध्यक्षमा बढुवा गरी नेता कृष्णबहादुर महरालाई महासचिव बनाउने गृहकार्य हुँदै आए पनि त्यसले मूर्तरूप लिन पाएन । महराले सचिवमै चित्त बुझाउनुपर्ने भएको छ । बोगटीको अनुपस्थितिमा महरालाई कार्यवाहक महासचिवको जिम्मेवारी दिनेगरी वरिष्ठ सचिव पदमा कुरा मिलेको हो ।
महासचिवको दाबी गरिरहेका महराले वरिष्ठ सचिव हुने भएपछि पद स्वीकार गरेको स्रोतको भनाइ छ । बुधबार र बिहीबार लामो छलफलपछि पदाधिकारी यो टुंगोमा पुगेका हुन् । पदाधिकारीहरू आन्तरिक गृहकार्यमा व्यस्त भएपछि ११ बजे केन्द्रीय कार्यालय पुगेका केन्द्रीय सदस्यहरू दिनभर भौंतारिएका थिए । अपराह्न साढे चार बजे अध्यक्ष पुष्पकमल दाहालले सबै तहमा गृहकार्य टुंगोमा पुगेको उल्लेख गर्दै शुक्रबार केन्द्रीय समितिमा प्रस्ताव पेस हुने बताएका थिए ।
'सबै गृहकार्य टुंगोमा पुगेको छ, शुक्रबार बैठकमा प्रस्ताव पेस हुनेछ,' उनको भनाइ थियो, 'केन्द्रीय पदाधिकारी, स्थायी, पोलिटब्युरो र केन्द्रीय समिति पनि विस्तार हुनेछ ।' केन्द्रीय समिति बैठकमा सम्बोधन गर्दै दाहालले १० मिनेटमै बैठक स्थगित गरेको घोषणा गरेका थिए ।
दाहालले महरालाई महासचिव बनाउने संकेत पाएपछि नेता वर्षमान पुन, टोपबहादुर रायमाझी, जनार्दन शर्मालगायतका नेताहरूले दाहालसमक्ष असन्तुष्टि जनाएको स्रोतले बताएको छ । हेटौंडा महाधिवेशनअघि महासचिवको पृष्ठभूमि तयार पार्न महरालाई संगठन विभाग प्रमुख बनाइएको थियो ।
नेताहरू रायमाझी, लोकेन्द्र बिष्टलगायतले पार्टीमा आफूहरू वरिष्ठ भएको र युद्धमा उत्तिकै योगदान भएको भन्दै महरालाई महासचिव बनाउने आधार दिन दाहाललाई आग्रह गरेका थिए । महाधिवेशनबाटै महरालाई महासचिव बनाउने विषयमा विवाद भएपछि दाहालले मध्यमार्गी बाटो अपनाउूदै बोगटीलाई महासचिव चयन गरेका थिए ।
यस्तै पुन, रायमाझी र गिरिराजमणि पोख्रेललाई सचिव बनाउनेमा केन्द्रीय पदाधिकारी बैठक टुंगोमा पुगेको छ । पुन दाहाल, रायमाझी उपाध्यक्ष बाबुराम भट्टराई र पोख्रेल अर्का उपाध्यक्ष नारायणकाजी श्रेष्ठनिकट नेता हुन् । महरा शिक्षक, रायमाझी र पोख्रेल संगठन, पुन सैन्य पृष्ठभूमिबाट राजनीतिमा आएका हुन् ।
कोषाध्यक्षमा हिसिला यमीलाई ल्याइने भएको छ । उनी उपाध्यक्ष बाबुराम भट्टराईकी पत्नीसमेत हुन् । एमाओवादीमा यमी महिलाको तर्फबाट पहिलोपटक केन्द्रीय पदाधिकारीमा पुगेकी हुन् । उनलाई कोषाध्यक्ष बनाउने विषयमा सर्वसम्मत निर्णय भएको थियो । उनी पोलिटब्युरोबाट दुई तह बढुवा भई एकैपटक हेडक्वाटरमा पुग्ने छिन् ।
अघिल्लो केन्द्रीय समिति बैठकमा केन्द्रीय पदाधिकारी विस्तार गर्ने सम्बन्धमा आएका तीन छुट्टाछुट्टै प्रस्तावमध्ये बोगटीलाई महासचिव कायम राखी चार सचिव पद बनाउने निर्णय गरिएको हो । एमाओवादीको विधानमा आवश्यकताअनुसार उपाध्यक्ष र सचिव बनाउन सकिने उल्लेख छ ।
 पूर्ववरिष्ठ पोलिटब्युरो सदस्यहरू हरिबोल गजुरेल, अग्नि सापकोटा, शक्ति बस्नेत, जनार्दन शर्मा र एमालेबाट प्रवेश गरेका रामचन्द्र झालाई स्थायी समितिमा ल्याउने तयारी छ । शुक्रबार केन्द्रीय समिति बैठकले यी नामहरूको अनुमोदन गर्नेछ । नेता बिष्ट, नन्दकिशोर पुन, बलदेव खनाल, हेमन्तप्रकाश ओलीले पनि स्थायी समिति सदस्यका लागि दाबी गरेका छन् । उनीहरूलाई वैकिल्पक स्थायी समिति सदस्यमा ल्याउने सम्भावना छ ।
नेताहरू अमिक शेरचन, लीलामणि पोख्रेल र दीनानाथ शर्मालाई स्थायी समितिमै कायम राखेपछि १७ सदस्यीय स्थायी समिति हुनेछ । प्रवक्ता अग्नि सापकोटाका अनुसार नौ सदस्यीय केन्द्रीय पदाधिकारी, १७ सदस्यीय स्थायी, ५१ सदस्यीय पोलिटब्युरो, एक सय ५१ पूर्ण केन्द्रीय सदस्य र वैकल्पिकसमेत गरी ३ सय ९९ जनाको केन्द्रीय समिति हुने छ । 'केन्द्रीय कार्यालयबाट सबै तहमा गृहकार्य भइसकेको छ,' उनले भने, 'सम्भवतः शुक्रबारको बैठकमा सबै निर्णय हुनेछ ।' पोलिटब्युरोमा वरिष्ठ केन्द्रीय सदस्य, पार्टी प्रवेश गरेका वरिष्ठ नेता र युवालाई ल्याइनेछ । केही नेताहरूका लागि वैकल्पिक पोलिटब्युरोको व्यवस्था गरिने सम्भावना छ ।
केन्द्रीय पदाधिकारीदेखि केन्द्रीय समिति विस्तार भएपछि नेताहरूको नयाू कार्यविभाजन हुनेछ । बैठकले संविधानसभा निर्वाचनको रणनीति, पुूजीवादी क्रान्तिअन्तर्गत उत्पादन तथा निर्माण योजनालगायत निर्णय गर्नेछ ।