यौनबजारमा चिनियाँ,रसियन,भारतीय,प्यालेस्टिनी युवतीसमेत सक्रिय

नेपालको यौनबजारमा चिनियाँ, रसियन, भारतीय, प्यालेस्टिनी युवतीसमेत सक्रिय रहेको प्रहरीको अनुसन्धानले देखाएको छ । प्रहरीका अनुसार ६ महिना अघिदेखि नेपाली यौनबजारमा विदेशी यौनकर्मीको संख्या बाक्लिँदै गएको देखिएको हो ।महानगरीय प्रहरी परिसर काठमाडौंका प्रमुख नवराज सिलवाल काठमाडौंको यौनबजारमा चिनियाँका साथै भारतीय, प्यालेस्टिनी र रसियन युवतीको सक्रियता बढेको बताउँछन् । उनी भन्छन्, ‘चिनियाँ युवतीझैं संगठित रूपमा नै अन्य देशकाहरू सक्रिय भएको भने देखिएको छैन ।

प्रहरीका अनुसार चिनियाँबाहेक अन्य राष्ट्रबाट आउने यौनकर्मीहरू नेपालमा रहेका उनीहरूका एजेन्टबाट माग आएपछि नेपाल भित्रिने गरेका छन् । उनीहरू निक्कै गोप्य रूपमा नेपालमा आउने र स्वदेश र्फकने गरेको प्रहरीको दाबी छ । विदेशी यौनकर्मी मगाउने एजेन्टहरूले एयरपोर्टदेखि नै उच्च सतर्कता अपनाएर उनीहरूलाई सम्बन्धित स्थानमा ल्याउने र पुर्‍याउने गर्दै आएको प्रहरीको अनुसन्धानमा खुलेको छ ।प्रहरी स्रोत विदेशी यौनकर्मी महिला नेपाल आएको बारेमा सूचना आउने गरे तापनि विदेशी यौनकर्मी महिलालाई नेपालमा मगाउने धन्दामा उच्च र शक्तिशाली वर्गको संलग्नता हुने गरेको र निक्कै गोप्य रहने गरेकाले तत्काल कारबाही नगरिएको दाबी गर्छ । स्रोतले भन्यो, ‘उनीहरू नेपाल भित्रिएदेखि नै हामीलाई जानकारी त हुन्छ, तर निक्कै गोप्य हुने र विदेशबाट आउने यौनकर्मीसमेत हाइप्रोफाइलका हुने भएकाले प्रमाण जुटाउन मुस्किल भएकाले हात हालिसकेका छैनौँ ।’ प्रहरी महँगा होटल अनि मुख्यतया क्यासिनोले ग्राहकको डिमान्डअनुसार विदेशी यौनकर्मी मगाउने गरेको दाबी गर्छन् ।

संगठित छन् चिनियाँ

विदेशी यौनकर्मीहरूमा चिनियाँ युवती संगठित रूपमा नै सक्रिय देखिएका छन् । बुधबारको घटनाबाट पनि यसको थप पुष्टि भएको छ । प्रहरी इकाइहरूको अनुमानअनुसार करिब सयको हाराहारीमा चिनियाँ युवती नेपाली यौनबजारमा सक्रिय छन् । उनीहरू होटल, लज तथा आफंै घर भाडामा लिएर नेपाली यौनबजारमा संलग्न हुने गरेका छन् ।प्रहरीका अनुसार पर्यटकीय क्षेत्रहरूमा खुलेका चिनियाँ होटल तथा रेस्टुरेन्टहरू उनीहरूको प्रमुख सम्पर्क केन्द्रहरू हुन् । ठमेल क्षेत्रमा मात्र चिनियाँका पाँचवटा रेस्टुरेन्ट छन् । लैनचौर प्रभागका प्रहरी निरीक्षक रुगमबहादुर कुँवर ठमेल क्षेत्रको यौनव्यापारमा विदेशी युवतीमध्ये चिनियाँ बढी देखिएको बताउँछन् । उनका अनुसार ठमेलमा रहेका चिनियाँ रेस्टुरेन्टहरूमा उनीहरूको उपस्थिति बाक्लो देखिन्छ । प्रहरीले पनि आफ्नो अनुसन्धानको केन्द्रमा यस्ता रेस्टुरेन्टहरूलाई राख्ने गरेको छ । प्रहरीले केही साताअगाडि बेजिङ रेस्टुरेन्टमा छापा मारेर केहीलाई पक्राउसमेत गरेको थियो ।एसपी सिलवालसमेत विदेशी यौनकर्मीहरूमा चिनियाँ बढी संगठित देखिएको बताउँछन् । उनले भने, ‘अन्य राष्ट्रका मागअनुसार आउने र फर्किहाल्ने गरेका देखिन्छन्, तर, चिनियाँचाहिँ लामो समयसम्म नेपालमै बसेर यौन व्यवसायमा संलग्न हुने गरेको देखिएको छ ।’

चिनियाँहरू प्रायः

पर्यटन भिसामा नेपाल आएर यौन व्यवसायमा संलग्न हुने देखिएको छ । बुधबार पक्राउ परेका चिनियाँ युवतीको बयानले पनि विदेशी युवती नेपाल घुम्ने बहानामा आएर यौनपेसामा सक्रिय हुने गरेको प्रहरीको दाबी पुष्टि गरेको छ । पक्राउ परेका ६ जना चिनियाँ युवती डेढ साता अगाडिमात्र पर्यटन भिसामा नेपाल आएका थिए । प्रहरीसमक्ष उनीहरूले आफू नेपाल घुम्न आएको र सम्पर्कको आधारमा ठमेलमा रहेको घरमा बस्ने गरेको बयान दिएका छन् ।चीनबाट युवती नेपाल ल्याएर देहव्यापारमा संलग्न गराउन चिनियाँ नागरिक नै सक्रिय छन् । व्यापारको बहानामा लामो समय नेपाल बस्ने अनुमति पाएका चिनियाँहरूले आफ्नो देशबाट पर्यटकका रूपमा यौनकर्मी ल्याएर राख्ने र भिसा सकिएपछि स्वदेश फर्काउने गरेका छन् ।बुधबार पक्राउ परेका कोठी-सञ्चालक चिनियाँ नागरिक योयाङ हुँका अनुसार प्रत्येक दुई महिनामा उनको कोठीमा चिनियाँ केटीहरू फेरिन्थे । पर्यटक भिसामा दुई महिना घुम्ने बहानामा नेपाल ल्याएर उनले ठमेलमा रहेको भव्य बंगलामा राखेर उनीहरूलाई देहव्यापारमा लगाउने गरेको प्रारम्भिक अनुसन्धानबाट खुलेको छ ।हुँले बयानमा २/२ महिनामा उनकी श्रीमतीले चीनबाट युवतीहरूलाई नेपाल घुमाउन ल्याएर यौनधन्दामा लगाउने गरेकोसमेत बताएका छन् । बुधबार प्रहरीले कोठीमा छापा मार्दा सञ्चालिका चीन गएकी थिइन् ।प्रहरी नै ठमेलमा बुधबार छापा मारेर बन्द गराइएको कोठी चिनियाँ युवतीको एक मात्र कोठी रहेको स्विकार गर्दैन । एसपी सिलवालको दावा छ, ‘ठमेल क्षेत्रमा मात्र यस्ता अन्य तीनवटा स्थान छन् जहाँ बसेर चिनियाँ युवती यौन व्यवसायमा संलग्न छन् । तर, उनी ती स्थानहरूको बारेमा खुलेर कुरा गर्न चाहँदैनन् । उनले भने, ‘अहिले हामी अनुसन्धानको क्रममा रहेकाले सबै विवरण सार्वजनिक गर्न मिल्दैन ।’

संख्यामा अन्योल

नेपालमा यौनकर्मीको संख्या कति छ भन्ने यकिन तथ्यांक कतै छैन । सन् २००५ मा एक अन्तर्राष्ट्रिय संस्था फेमिली हेल्थ अर्गनाइजेसनले गरेको अनुसन्धानमा नेपालमा आठ हजार यौनकर्मी सक्रिय रहेको देखिएको थियो । केही समयअगाडि कम्युनिटी एक्सन नेपालले यौनकर्मी महिलाको बारेमा अनुसन्धान गरी प्रत्येक वर्ष दुई हजारको संख्यामा यौनकर्मीको संख्या बढ्ने गरेको दाबी गरेको थियो । यी दुवै अनुसन्धानको आधारमा अहिले करिब १५ हजारको संख्यामा नेपाली यौनकर्मी महिला सक्रिय रहेको अनुमान गर्न सकिन्छ ।तर, विदेशी महिला यौनकर्मीको बारेमा भने अहिलेसम्म कसैले अनुसन्धान गरेको छैन । एक अनुमानअनुसार काठमाडौंमा सबैभन्दा बढी चिनियाँ युवती यौन व्यवसायमा सक्रिय छन् । उनीहरूको संख्या सयको हाराहारीमा रहेको प्रहरीको अनुमान छ । उनीहरू पर्यटकको बढी चहलपहल हुने काठमाडौंको ठमेल र ललितपुरका केही क्षेत्रमा सक्रिय छन् ।तर, अन्य विदेशी यौनकर्मीहरू संगठित रूपमा भन्दा पनि मागअनुसार नेपाल आउने गरेकाले उनीहरूको संख्या यत्ति नै हुन्छ भन्न गाह्रो छ ।

कानुन नहुँदा सास्ती

आधुनिक बंगला भाडामा लिएर यौनधन्दामा संलग्न रहेको अभियोगमा पक्राउ परेका सात चिनियाँ नागरिकमध्ये कोठी सञ्चालकलाई मात्र प्रहरीले कारबाही गरेको छ । प्रहरीले पक्राउ परेका पाँच नेपाली ग्राहक र ६ चिनियाँ युवतीलाई रिहा गरी सञ्चालक योयाङ हुँलाई अनुसन्धानका लागि म्याद थप गरी हिरासतमा राखेको छ । उनीमाथि प्रहरीले सार्वजनिक अपराध गरेको अभियोगमा कारबाही चलाउने तयारी गरेको छ ।होटल, लज तथा कोठीहरूमा छापा मारेर प्रहरीले यौनकर्मीको अभियोगमा युवतीहरूलाई पक्राउ गर्ने गरे पनि स्पष्ट कानुनको अभावमा सार्वजनिक अपराधअन्तर्गत कारबाही चलाउने गरेको छ । देहव्यापारलाई कानुनविपरीतको गतिविधि रहेको उल्लेख गर्दै स्पष्ट सजायको व्यवस्था भएको कुनै कानुन छैन । स्पष्ट कानुनको अभावमा प्रहरीले मुलुकी ऐनलाई टेकेर समाजमा नकारात्मक प्रभाव पारेको भन्दै यौनकर्मी र उनीहरूका ग्राहकलाई कारबाही गर्दै आएको छ ।स्पष्ट कानुनको अभावमा संगठित रूपमा नै यौन व्यवसाय सञ्चालन गर्नेहरू उम्किने गरेका छन् । प्रहरीले पक्राउ परेका नेपाली श्याम अग्रवाल, सूर्य क्षेत्री, विष्णु शर्मा र बुद्ध लामालाई र चिनियाँ युवतीहरू ला याङयाङ, सुन कुतोज, इयाङ वेल, लि इलिया, योङ विरोङ, योयाङ हँु, जान चाङ हुङ र भि वाङलाई बिहीबार बेलुका रिहा गरेको थियो